SA AKONG PAGDUNGAW
ni Gil Maningo
April 21, 1999
3:00 AM
(Published April 18, 2009)
SA AKONG PAGDUNGAW UBAN SA KAHAYAG SA BUWAN
NAHILAMBIGIT ANG DUHA KA ANINO
SA DUHA KA MGA BINUHAT
NGA NAGLINAWKAWANAY ILAWOM SA MABUGNAW NGA KAGABHION.
HATAGI AKO SA HIGAYON NGA MOTUPAD
SA IMONG KILIRAN...
ARON AKONG IPABATI DIHA KANIMO
ANG KAINIT SA AKONG MGA HALOK
ANG WALAY PUAS NGA GAKOS
NGA GIHAGPATAN SA MGA SILAK SA MGA BITUON
NGA MIDAN-AG SA IMONG MANIPIS NGA SAPOT
NGADTO SA IMONG TABONON NGA MGA APING
PASAGDI AKO NGA MASA-AG SA AKONG PAGKABUANG...
PASAGDI AKO... NGA ITAP-IL KO KANIMO ANG AKONG MGA NGABIL
NGA DUGAY NANG NAGPANUKO
SA PAGHABOL SA IMONG PAGKABINUHAT.
KUNG AKO ANG MAGHARI SA TANANG KALIBUTAN
AKO MAOY IMONG SULOGOON...
KUNG AKO ANG GABII
AKO'NG IHATAG KANIMO ANG TANAN, TANAN
NGA MGA BITUON
UG DAKPON KO SA PAGLAKIP ANG MGA TAGAK NGA MGA BITUON
UG PUPHO-ON KO DIHA SA IMONG ATUBANGAN
ARON PASIGAHON KO SA PAGBALIK UG ISABWAG
SA KAHANGINAN UG MAOY AKONG IBANWAG
SA PANAHON SA KANGITNGIT ARON IKAW DILI MAHISALAAG...
AYAW KAHADLOK KAY DILI UG DILI KO IKAW ANGKUNON
KUNG MAO MAN UGALING KANA ANG MOHUPAY
SA IMONG KAHADLOK UG KAHINGAWA...
SA AKONG PAGDUNGAW, IKAW DIAY ANG AKONG DAMGO
